Янка Купала – ს დღეები წყალტუბოში

2016 წლის 02.06 დან – 04. 06 მდე ა(ა)იპ„წყალტუბოს მუნიციპალიტეტის კულტურისა და ტურიზმის განვითარების ცენტრის“ ინიციატივით და წყალტუბოს მუნიციპალიტეტის გამგეობის ხელშეწყობით წყალტუბოს გიორგი ახვლედიანის მხარეთმცოდნეობის მუზეუმში გაიმართა, ცნობილი ბელორუსი მწერლისადმი მიძღვნილი ღონისძიება სახელწოდებით: „ Янка Купала-ს დღეები წყალტუბოში.“

წყალტუბოს სტუმრობდნენ ბელორუსიიდან, კერძოდ, მინსკიდან იანკა კუპალას სახელობის მუზეუმის დირექტორი ЕЛЕНА ЛЕШКОВИЧ, მუზეუმის მეცნიერ-მუშაკი ЕЛИНА СВИРИДОВИЧ და ОЛГА ПАРХИМОВИЧ, ასევე ჟერნალისტები ОЛГА ГРАДИНАР და ЮЛИЯ АКСЮЧИЦ.

სტუმრები თავიანთი პროგრამით წარსდგნენ დამსწრე საზოგადოების წინაშე. პროგრამა მოიცავდა იანკა კუპალას ცხოვრებასა და შემოქმედებას.

როგორც ჩვენთვის ცნობილია, იანკა კუპალა ისვენებდა წყალტუბოში 30-იან წლებში, იღებდა სამკურნალო აბაზანებს, სწორედ ამ პერიოდში შეუყვარდა მას მისი მკურნალი ექიმი, ქართველი ქალი – ელენე მეტეხელი. ქალბატონი ელენე პოეტის მუზა გამხდარა. ყოვლად სუფთა და უმანკო იყო იანკა კუპალას გრძნობა ელენესადმი და მას მიუძღვნა ლექსი „ГЕНАЦВАЛЕ“.

ასევე ძალზედ საყურადღებოა ის ფაქტი, რომ იანკა კუპალა ხშირად მოგზაურობდა და რამოდენიმე ქვეყანაში ცხოვრობდა კიდეც გარკვეული დროით, მაგრამ არცერთ ქვეყანაზე ლექსი არ დაუწერია. ხოლო აი ქართულმა ბუნებამ და სტუმართმასპინძლობის სამაგალითო დამოკიდებულებამ შთააგონა შეექმნა ისეთი სტრიქონები, რომლებიც მის განცდებსა თუ გრძნობებს დიდი სითბოთი და სიმძაფრით ასახავდა. იანკა კუპალას ლექსები 117 ენაზეა ნათარგმნი.

ბელორუსიიდან როდესაც დაგვიკავშირდნენ, გვთხოვეს როგორმე მოგვეძებნა ელენე მეტეხელის ოჯახი. მოგეხსენებათ, ეს არ იყო ადვილი რადგან ეს ომამდე პერიოდში ხდებოდა, მაგრამ ღონისძიების ორგანიზატორებმა ნინო კუჭავამ და თამთა ვარდოსანიძემ მივლინებაში ყოფნის დროს გავარკვიეთ რომ ელენე მეტეხელი, რომელიც იყო იანკა კუპალას პოეტური მუზა, ცოლად გაჰყოლია  გივი ჯავახიშვილს (შემდგომში მინისტრთა საბჭოს თავმჯდომარეს), მათ ჰყავდათ ერთადერთი ქალიშვილი ლალი ჯავახიშვილი, რომელიც 3 წლის წინ გარდაიცვალა, მას დარჩა 3 შვილი – თამაზ ყურაშვილი, გივი ყურაშვილი და ლელა ყურაშვილი. როგორც აღმოჩნდა ქალბატონი ელენეს შვილიშვილები ცხოვრობენ თბილისში, ორი მათგანი ექიმია, ხოლო მესამე საქართველოს ელჩია შვეიცარიაში. ჩვენ სტუმრად ვიმყოფებოდით ქალბატონი ლელა ყურაშვილის ოჯახში, სადაც ძალზედ თბილად მიგვიღეს და მოგვაწოდეს ჩვენთვის მნიშვნელოვანი და საინტერესო ინფორმაცია. აღსანიშნავია, რომ მათ შეასრულეს დანაპირები და ჩამობრძანდნენ წყალტუბოში ღონისძიებაზე დასასწრებად.

 13390936_856344761163222_1238829679_n

 

 

ძალზედ გულთბილი იყო ბელორუსი სტუმრების და ელენე მეტეხლის შვილიშვილების შეხვედრა, კიდევ ერთხელ დავრწმუნდით რომ ცხოვრებაში შემთხვევით არაფერი არ ხდება… მეტეხელის შვილიშვილებმა სტუმრებისაგან სიმბოლური საჩუქრები მიიღეს. ასევე საჩუქრები მიიღო სამუზეუმო გაერთიანების მენეჯერმა ქალბატონმა ია კუხალაშვილმა. ხოლო ღონისძიების ორგანიზატორებმა МАРИНА ПОДГУРСКАЯ-КУТАТЕЛАДЗЕ, თამთა ვარდოსანიძემ და ОЛГА ГРАДИНАР-მა და ნინო კუჭავამ, მიიღეს დიპლომები, დახმარებისა და თანადგომისათვის მადლობა გადაუხადეს სოფიო მიქელაძეს და მუზეუმის კოლექტივს.

მინსკის მუზეუმის დირექტორმა ЕЛЕНА ЛЕШКОВИЧ – მა წყალტუბოს მუნიციპალიტეტის გამგეობას ბელორუსიის კულტურის მინისტრის მიერ ხელმოწერილი წერილი გადასცა .

ვიზიტის ფარგლებში ბელორუსმა სტუმრებმა მოინახულეს წყალტუბოს სააბაზანოები და გაეცნენ წყლის უნიკალურ თვისებებს, ასევე მოინახულეს „პრომეთე“, ნიკო ლორთქიფანიძის სახლმუზეუმი(იანკა კუპალა და ნიკო ლორთქიფანიძე ახლო მეგობრები იყვნენ). ლორთქიფანიძის მუზეუმის ნახვამ   მეტად აღაფრთოვანა კუპალას  მუზეუმის წარმომადგენლები. ასევე მოინახულეს ის ადგილები, რომელსაც საქართველოში სტუმრობის დროს სწვევია ბელორუსი პოეტი. ესენია: ხომულის ციხე, გელათი, მოწამეთა. ნანახმა  მოლოდინს გადააჭარბა, სტუმრები ემოციებს ვერ მალავდნენ. ასევე ესტუმრნენ სანატორიუმს, სადაც იანკა კუპალა ისვენებდა, სამწუხაროდ სანატორიუმი აღარ ფუნქციონირებს.

დასკვნით ღონისძიებას, რომელიც მიეძღვნა ბელორუს სტუმრებს, წარუძღვა  ა(ა)იპ „წყალტუბოს მუნიციპალიტეტის კულტურისა და ტურიზმის განვითარების ცენტრის“ მმართველის მოადგილე ქ.ნ ლილი გელენიძე, ანსამბლმა ნადურმა კიდევ ერთხელ დაარწმუნა ბელორუსი სტუმრები „ქართული სულის“ უკვდავებასა და მრავალსაუკუნოვან ისტორიაში. წყალტუბოს საჯარო სკოლის მოსწავლეებმა დიდი სიყვარულით წაიკითხეს იანკა კუპალას ლექსები, როგორც ქართულ ასევე რუსულ ენაზე ნათარგმნი, ყოველივე ამან დიდი შთაბეჭდილება მოახდინა სტუმრებზე, ასევე დიდი სითბოთი და სიყვარულით ისაუბრა ქალბატონმა ნინო ლექვთაძემ წყალტუბოს ისტორიაზე და სტუმრებს ბევრი საინტერესო ფაქტი გააცნო. ძალზედ სასიხარულო ფაქტია ის რომ გაფორმდა წყალტუბოს გიორგი ახვლედიანის მხარეთმცოდნეობის მუზეუმსა და მინსკის იანკა კუპალას მუზეუმს შორის თანამშრომლობის ხელშეკრულება.

ღონისძიების ბოლოს „წყალტუბოს მუნიციპალიტეტის კულტურისა და ტურიზმის განვითარების ცენტრის“ თანამშრომლებისაგან სტუმრებს საჩუქრად გადაეცათ ქართველი ერის საგანძური შოთა რუსთაველის „ვეფხისტყაოსანი“ და  წიგნები წყალტუბოს შესახებ ხოლო მუზეუმის თანამშრომლებმა სტუმრებს გადასცეს სამახსოვრო საჩუქრები.

დასკვნით ეტაპზე კი ბელორუსი ხალხის წეს-ჩვეულების თანახმად გვირილების გვირგვინები, რომლებიც ღონისძიების მიმდინარეობისას დამსწრე ქალბატონებს თავზე ეკეთათ, წყალს გაატანეს.

იანკა კუპალას ქართული სულისადმი სიყვარულმა ჰპოვა მომავლის ნაბიჯები ქართულ მიწაზე. პროექტის მიზანი, ორ მოძმე ერს შორის მეგობრული კავშირების გაღრმავება, წარმატებით ხორციელდება.

Connect with Me: